سكوتنا غدر
عم تدبل ورودك قدام عينينا
عم تيبس الأرزة والكل ملهيين
عم يئن جبلك من الظلم
موجوع من قسوة الحاكمين
صارت حكاياتك كلها حزن
بقلب ابتسامتك عم بسمع أنين
يا وطن الكرامة
يا عالي الجبين
يا غناية مجبولة
عطر وسحر وعرق الفلاحين
عحفافيك نقش المجد
سنا عزك
ولأجل حبك
انساب الشهدا شلال حنين
ما عزوا عنك الدم
ولا بخلوا بحالن قرابين
وهلأ يا وطن الأنبيا والقديسين
شايفة الجوع ورا الباب
والشبع حكر عالطائفيين
تَوْبك المغزول بخيوط الفرح
مزقو طمع وشجع الفاسدين
تجار..زعما..سياسين
ماركة للنهب والسرقة مسجلين
كلنا يا لبنان عم نقتلك
كلنا خونة مجرمين
ليلك المليان حب وحياة
طفيناه نحنا
قتلنا حلاك
لف الذل حبال الفقر عخناقك
وسكوتنا بضهرك ألف سكين
