يا عيد عم نفتش عليك
الحزن خنق حلمنا
وينك لنلتف حواليك
ونرجع نزرعك بيومنا
دبلت البوسة عخديْك
ومعك كبر همنا
جاي عشعب مقهور
الموت رياحتو الوحيدة
الزعيم بظلمو مسرور
فرحتك كتير بعيدة
ضاقت العيشة بالوطن
علّو سياج السجن
صارت المي بالقطارة
والكهربا سمة بدن
خافوا ربكن بهالشعب
حياتنا معكن فيلم رعب
لا بتحلّو عن ضهرنا
ولا عزرائيل عارفلكن درب
نشفت دموعنا علبنان
ما بيستاهل حكمكن
قرطة حرامية زعران
الله لا يشبع كرشكن
حاجي تطلبوا منا الصبر
تعبنا وتعب منّا القهر
ما كذبوا لمن قالوا
بعد الصبر..مجرفة وقبر
وإنت يا شعب نايم شو ناطر؟
كسروا قلبك ما خلولك خاطر
ارفض الظلم…واعلنها ثورة
علق المشانق للزعران
مابخلّصنا إلا المقابر
