وبغار من حالي على دروب الوما
من غمزة عيوني ع صفنة مطرحِك
بخاف انْ مرقتي بالفلا توطي السما
يطل الهوى يسلم عليكِ ويجرحك
وبغار من قمصانِك وخيطانها
من صوت همس الروح لما بتهمسي
من غرفتِك عم غار ، من حيطانها
من الأرض يلي فوق منها بتدعسي
وبغار من عطرك اذا عطرك عبق
من شَعرِك المشتاق تا يحاكي الظلام
كلما عبق عطرك من كمام الحبق
بيضحك مسا الإلهام ع شفاف الكلام
وقدما عليكِ بغار جنّوا العينتين
بمنظر حلاكِ الدوّب شموع الحكي
كلما غمزتك بالوما ع الميلتين
بيموت طيف الضحك تايعيش البكي
انتِ الإذا مرقتي قبالي بشوف طيف
وبحس قلبي رفرف بجانح وحيد
إنتِ بحرب الشوق بُعدِك جرح سيف
بيتقطب بخيط المعنى والقصيد
إنتِ الإذا مشيتي بكعب عالي بشوف
تحتك بيغفى الصوت وبيوعى الزهر
إنتِ ال على شفافك بيتمشوا الحروف
ومن دمعة عيونك بيتوضى القهر
إنتِ الإذا سِهْيت عيوني بالغفا
بشوفك بحلمي بْكل غفوه وما بفيق
بكفي طريق الحلم وبداري الوفا
ما الحب بالإحساس ما بيعرف جفا
كلما طريق بيغلق بيفتح طريق …
