“ياريتني…”قصيدة بقلم الشاعرة سناء زين معتوق

ياريتني…..

ياريتني قَدَر
بخَبي لكل عاشق قَمر
وبقلُوب كل المحبين
برشْرِش عطر الزهر

ياريتني حب
بغسِل من الحقد كِل قلب
ت المحبة تغمر إيامنا
ويزهّر الأمان بكل درب

يا ريتني نِسمة صفا
بمرُق عحدود الغفا
بقطف عناقيد الأمل
بعلّم الغدر قيمة الوفا

ياريتني شوء(شوق)
بحمل رسايل حب وزوء (ذوق)
بشعّل قناديل السهر
بعلقن عالنجوم فوء (فوق)

ياريتني حِلِم
من قلب الحقيقة مش وَهم
بخطف السعادة خطف
برسمها عالوجوه رسم

ياريتني عتاب
بين القلوب المحِبة
إسأل وأنطر جواب
لأن العتب عَقَد المحَبة

ياريتني بلسم شافي
عجروح حَفرتها المنافي
إشفي كل صرخة روح
ووجع عجناب الوطن غافي